Tá cuimhneamh teipe sa gCorn Domhanda i 2007 go láidir i meoin Uí Chonnaill, mar atá i meoin gach duine rugbaí na tíre. Ní raibh mórán ag tnúth go n-insíodh an Drisceollach an scéal go léir ina dhírbheathaisnéis agus d'fhán sé ina thost, mar is gnáth. Leanann scéal na bliana rugbaí sin go léir ina rún os comhair an phobail.
Agus anois, tá Corn Domhanda eile ag teacht agus pobal na hÉireann ag smaoineamh anois go n-éireodh linn an Corrán féin a ghabháil, agus sinne gan bua dá laghad i ndiaidh na gcluichí ghasra fós.
Ach seo foireann eile, a deirtear. Is é Joe Schmidt an saineolaí rugbaí is fearr sa ndomhan mór. Níl an glas ann nárbh fhéidir leis a oscailt. B'fhéidir. An uair deireanach a chuireas súil ar an scéal, ba iad na h-imreoirí amháin a bhí ar an bpáirc agus na traenálaithe go léir suas istigh 'sna ardáin, ach tá an cluiche chomh athraithe chomh tapa le déanaí tá seans ann go bhfuil dúl amú orm.
Ag smaoineamh ar na buanna in aghaidh na hAstráile agus na hAfraice Theas, cén fáth gur éirigh leis na Gaeil? An bhfuil siad chomh maith sin i ndáiríre?
Is deacair é a thuiscint ón meáin Éireannach, a chuireann na geansaithe uaithne orthu níos tapa maidir leis an rugbaí ná nuair a bhí Jack Charlton ann sa sacar. Bíonn an meáin Breataine réidh i gcónaí cnámh a chaitheamh chun na Gaeil fiáine, agus tá mo laethanta scoile chomh fada thiar liom anois níl fios agam cad a scríobhtar fúinn sa bhFrainc. Tá a bhfadhbanna féin acu ar ndóigh, na créatúir.
Agus an rugbaí éirithe chomh casta mar atá, breathnaím ar cluichí anois agus espnscrum.co.uk oscailte agam ar mo thablet, ag breathnú ar staitisticí an chluiche. D'éirigh linne an méid seo clibirte a bhuaigh, d'éirigh leosan an méid sin síneadh amach. Ní fhéidir na staitisticí go léir a chreideamh – bhí sé ghreamú aimsithe ag Ian Madigan acu, mar shampla, ach is ait é an greamú nuair a leanann an imreoir greamaithe ar aghaidh mar a bhí sé, ach go bhfuil Madigan anois aige mar phaisinéir chomh maith – ach cabhraíonn na staitisticí an cluiche gairmiúla a thuiscint.
Níor chabhair na staitisticí liom aréir, mar bhí an lámh in uachtar ag na hAstraláisigh ón chuid is mó imeartha. Níos mó seilbhe, níos mó talaimh, níos mó gach rud ag an Astráil ach cúlaithe ar an mbord, an t-aon staitistic amháin atá ina rí ar gach uile ceann acu. Bhí an t-ádh ag na Gaeil nuair a d'aimsigh Zebo agus Bowe a n-úid, agus ba é sin scéal an chluiche. Bhí an bearna ró-mhór do na hAstraláisigh.
Ní hea sin drochmheas ar cliathánaithe na hÉireann. Thógadar a seasanna, agus sin é an fáth go bhfuil siad ann, chun na seasanna sin a thógáil, in ionad an liathróid a ligeadh chun tosaigh nó praiseach éigin eile a dhéanamh as na seansanna.
Ach ar chonaiceamar fianaise i rith an Fómhair gurbh fhéidir leis na Gaeil an Corrán Domhanda féin a bhuaigh? Caithfear níos mó na an dhá úd sin a bheith ann. Tá an paca láidir go leor agus cróga a ndóthain, ach bhíodar faoi bhrú sa gclibirt agus agus ní hé an Astráil an fhoireann is fearr san obair sin sa domhain.
Tá Robbie Henshaw ag dul go maith i mbróga móra Uí Dhrisceoill chomh fada seo, ach tá D'Arcy sean go leor agus ní fheictear mórán luais idir an bheirt acu. Bhí an luas caillte ag BOD féin sa ndeireadh ach bheadh BOD ina imreoir agus é ar leathchos – fios ag gach éinne faoi sin.
Tá daoine ag súil go bhfillfidh Seán O'Brien agus Cian Healy agus níorbh aon íobairt é ceachtar acu a chur istigh sa bhfoireann, ach ag an am céanna tá imní orm maidir leis an bhfoireann seo.
Agus an bliain ina h-uimhir chorr, beidh Sasana agus an Fhrainc againn sa mbaile, ach tá an Albain tar éis feabhsú faoi Vern Cotter agus ní bhog an turas é ríomh dul chomh fada le Caerdydd agus an lámh in uachtar a fháil.
I mblianta roimhe seo, beidh buntáiste mór ag aon fhoireann agus leath-chúlaí amach na Leoin acu, ach tá dualgas agus stíl imeartha an leath-chúlaí athraithe. Níl an chumhacht céanna a bhí acu mar a bhíodh san seanshaol, agus leithid Barry John nó Phil Bennett nó Hugo Porta nó Jackie Kyle ina sheasamh taobh amuigh na clibirte.
Anois, tá níos mó dualgas ar an leath-chúlaí clibirte an imirt a chur i bhfeidhm. Is ar seisean atá an rogha idir cic, pas nó aimsiú a dhéanamh. Tráth, ba é mar dara geansaí a 10 é an 12; anois, a mhalairt a scéal atá ann. Tá seans ann go dtiocfaidh an lá agus, in ionad an chéad líne aimsithe é an leath-chúlaí amach, beidh sé ina chéad líne cosaint. Is fada an titim ar péacóg breá bródúil an rugbaí é.
